టిమ్ కుక్ మ్యాజిక్.. పదేళ్లలో భారత్‌లో చౌకగా మారిన ఐఫోన్!

ఈ విషయం చాలామందికి ఆశ్చర్యం కలిగించవచ్చు. నమ్మడానికి కూడా ఇష్టపడకపోవచ్చు. కానీ వాస్తవం ఏమిటంటే, పదేళ్ల క్రితంతో పోలిస్తే భారతదేశంలో ఐఫోన్ ఇప్పుడు మరింత అందుబాటు ధరలో లభిస్తోంది. రూ. 80,000 పెట్టి కొత్త ఫోన్ కొనేవారికి ఇది నిజం కాదనిపించినా, గణాంకాలు మాత్రం ఇదే విషయాన్ని స్పష్టం చేస్తున్నాయి. దీని వెనుక యాపిల్ సీఈవో టిమ్ కుక్ అనుసరించిన వ్యూహాత్మక నిర్ణయాలున్నాయి.

గణాంకాలను పరిశీలిస్తే ఈ విషయం స్పష్టమవుతుంది. 2016లో విడుదలైన ఐఫోన్ 7 ప్రారంభ ధర రూ. 60,000. నాటి నుంచి నేటి వరకు ఉన్న ద్రవ్యోల్బణాన్ని పరిగణనలోకి తీసుకుంటే, దాని ప్రస్తుత విలువ సుమారు రూ. 94,000 అవుతుంది. కానీ, 2026లో లేటెస్ట్ ఐఫోన్ 17 ప్రారంభ ధర రూ. 82,900 మాత్రమే. అంటే, ద్రవ్యోల్బణంతో పోల్చినా కొత్త ఐఫోన్ ధర దాదాపు రూ. 11,000 తక్కువగా ఉంది.

కేవలం ధర మాత్రమే కాదు, సగటు భారతీయుడి ఆదాయంతో పోల్చినా ఐఫోన్ ఇప్పుడు చౌకగానే వుందని చెప్పాలి. 2016లో సగటు వార్షిక తలసరి ఆదాయంలో ఐఫోన్ ధర 37 శాతం ఉండగా, 2026 నాటికి అది 31 శాతానికి తగ్గింది.

ధరలు పెరగకపోవడమే అసలు వ్యూహం
ఐఫోన్ ధరలు అందుబాటులోకి రావడానికి టిమ్ కుక్ అనుసరించిన విధానాలే కారణం. ఆయన నేరుగా ధరలు తగ్గించలేదు, కానీ పెరగకుండా నియంత్రించారు. 2020లో వచ్చిన ఐఫోన్ 12 నుంచి 2024 నాటి ఐఫోన్ 16 వరకు, వరుసగా ఐదేళ్ల పాటు వనిల్లా మోడల్ ధరను రూ. 79,900 వద్దే స్థిరంగా ఉంచారు. కరోనా, సరఫరా గొలుసు సమస్యలు, విడిభాగాల ధరల పెరుగుదల వంటివి ఉన్నా యాపిల్ ధరలు పెంచలేదు. దీనికి తోడు, భారత్‌లోనే ఐఫోన్ల తయారీని పెంచడం వల్ల దిగుమతి సుంకాలు తగ్గి, ధరలను అదుపులో ఉంచడం సాధ్యమైంది.

భారత మార్కెట్ కోసం ప్రత్యేక ప్రణాళిక
ఇతర దేశాల్లో కొత్త మోడల్ రాగానే పాతదాన్ని నిలిపివేస్తారు. కానీ భారత్‌లో యాపిల్ పాత తరం ఐఫోన్‌లను కూడా తక్కువ ధరకు అమ్ముతూనే ఉంది. దీనివల్ల తక్కువ బడ్జెట్‌లో ఐఫోన్ కొనాలనుకునేవారికి అవకాశం దొరుకుతోంది. ఫ్లిప్‌కార్ట్, అమెజాన్ వంటి ఈ-కామర్స్ సైట్లలో ప్రత్యేక సేల్స్ సమయంలో పాత ఐఫోన్లపై భారీ డిస్కౌంట్లు లభిస్తున్నాయి. ఈ వ్యూహాలన్నీ కలిసి, ఒకప్పుడు విలాసవంతమైన వస్తువుగా ఉన్న ఐఫోన్‌ను నేడు మధ్యతరగతికి సైతం చేరువ చేశాయి. అందుకే గతంతో పోలిస్తే ఇప్పుడు మన చుట్టూ ఐఫోన్ వాడేవారి సంఖ్య గణనీయంగా పెరిగింది.